ពិភពលោក៖ ​​ប្រធានាធិបតីបារាំង អេម៉ានូអែល ម៉ាក្រុង (Emmanuel Macron) នៅថ្ងៃអង្គារ ទី៥ ខែមីនានេះ បានស្នើទៅកាន់បណ្ដាសម្ព័ន្ធមិត្តរបស់អ៊ុយក្រែនទាំងអស់ កុំឱ្យមាន "ភាពកំសាក" ក្នុងការចេញមុខគាំទ្រប្រទេសអ៊ុយក្រែនក្នុងសង្គ្រាមជាមួយរុស្សី។ លោកបន្ថែមថា លោកគាំទ្រទាំងស្រុងជុំវិញមតិដ៏ចម្រូងចម្រាស់ជុំវិញការចល័តទ័ពរបស់លោកខាងលិចទៅកាន់ប្រទេសអ៊ុយក្រែន ដែលមតិនេះបានធ្វើឱ្យមានការភ្ញាក់ផ្អើលជាខ្លាំងនៅជុំវិញទ្វីបអឺរ៉ុប។ 

ក្នុងដំណើរទស្សនកិច្ចទៅកាន់សាធារណរដ្ឋឆេក លោក Macron និយាយថា៖ "យើងប្រាកដជានឹងអាចឈានដល់ពេលវេលាមួយ ដែលសហភាពអឺរ៉ុបនឹងមិនចាំបាច់មានភាពកំសាកតទៀត"។ ថ្លែងនៅក្រោយជំនួបជាមួយសមភាគីប្រធានាធិបតីឆេក លោក Petr Pavel ប្រធានាធិបតីបារាំង លោក Macron លើកឡើងជាសំណួរថា៖ "តើនេះមិនមែនជាសង្គ្រាមរបស់យើងទេឬ? យើងអាចមើលពីចម្ងាយដោយជឿជាក់ថា អ្វីៗត្រូវទៅតាមដំណើរបែបនេះឬ?"

គួរបញ្ជាក់ថា សម្ព័ន្ធមិត្តរបស់បារាំងភាគច្រើនថ្លែងថា រដ្ឋាភិបាលរបស់ខ្លួននឹងមិនបញ្ជូនទាហានរបស់ខ្លួនទៅអ៊ុយក្រែនទេ ដែលការលើកឡើងនេះបន្ទាប់ពីមានការស្នើដោយលោក Macron កាលពីថ្ងៃទី២៦ ខែកុម្ភៈកន្លងទៅ។ យ៉ាងណាមិញ សហរដ្ឋអាមេរិកបានបញ្ជាក់កាលពីថ្ងៃអង្គារកន្លងទៅថា អ៊ុយក្រែនពុំធ្លាប់ស្នើឱ្យមានការដាក់ពង្រាយកងទ័ពរបស់លោកខាងលិចនៅលើទឹកដីរបស់ខ្លួនឡើយ។

ដោយឡែក រដ្ឋមន្ត្រីការពារជាតិអាល្លឺម៉ង់ឆ្លើយតបទៅនឹងការលើកឡើងរបស់ប្រធានាធិបតីបារាំងថា សំដីរបស់មេដឹកនាំបារាំងរូបនេះជាសម្ដីដែលមិនមានប្រយោជន៍។ ក្រោយជំនួបជាមួយរដ្ឋមន្ត្រីការពារជាតិស៊ុយអែតនៅឯរដ្ឋធានី Stockholm លោក Boris Pistorius ថ្លែងថា៖ "មែនទែនទៅ! វាគ្មានភាពចាំបាច់ណាមួយឡើយក្នុងការជជែកវែកញែកពីភាពក្លាហានតិច ឬក្លាហានខ្លាំងក្នុងកាលៈទេសៈនេះ។ ការជជែកអំពីបញ្ហានេះមិន​អាច​ជួយ​ដោះ​ស្រាយ​បញ្ហា​ដែល​យើង​ប្រឈមមុខក្នុងការផ្តល់ជំនួយទៅកាន់អ៊ុយក្រែននោះទេ"៕